रामेछाप- रामेछाप जिल्लामा सञ्चाललित सहकारी संस्थाका सञ्चालक, व्यवस्थापक र कर्मचारीहरुको लागि करदाता शिक्षा तालिम सञ्चालन गरिएको छ । मन्थली नगरपालिकाको आर्थिक सहयोग तथा रामेछाप जिल्ला बचत तथा ऋण सहकारी संस्था लिमिटेडको आयोजनामा बिहिवार एकदिने करदाता शिक्षा तालिम आयोजना गरिएको हो ।
करदाता सेवा कार्यालय मन्थली र नेपाल बचत तथा ऋण केन्द्रीय सहकारी सङ्घ नेफ्स्कुनको प्राविधिक सहयोग तथा रामेछाप जिल्ला बचत तथा ऋण सहकारी सङ्घ, जिल्ला कृषि सहकारी सङ्घ, रामेछाप, जिल्ला वहुउद्देश्यीय सहकारी सङ्घ, रामेछाप र जुनार कृषि सहकारी सङ्घको सहकार्यमा आयोजना गरिएको उक्त कार्यक्रमको उद्घाटन मन्थली नगरपालिकाका प्रवक्ता गोपाल श्रेष्ठले गरेका थिए ।
तालिम उद्घाटन कार्यक्रमलाई सम्बोधन गर्दै प्रवक्ता श्रेष्ठले सहकारी संस्थाहरु विधि र विधानमा चल्नु पर्ने बताए । सहकारी संस्थाहरुले ऐन नियमको पूर्णपालना गरेमा सहकारीमा समस्या नआउने पनि उनले बताए । मन्थली नगरपालिका सहकारी संस्थाहरुसँग सहकार्य र सहयोग गर्न तयार रहेको प्रवक्ता श्रेष्ठको भनाइ थियो ।
रामेछाप जिल्ला बचत तथा ऋण सहकारी संस्था लिमिटेडका अध्यक्ष जगन्नाथ दाहालको अध्यक्षतामा भएको तालिम उद्घाटन कार्यक्रमका अतिथिहरुमा मन्थली नगरपालिकाका प्रमुख प्रशासकीय अधिकृत देवर्षि सापकोटा, करदाता सेवा कार्यालय मन्थलीका कर अधिकृत प्रतिमा घिमिरे, जिल्ला सहकारी सङ्घका अध्यक्ष हिमाल ढुङ्गेल, मन्थली नगरपालिका सहकारी शाखा प्रमुख तथा अधिवक्ता सुदर्शन राय, नेफ्स्कुन सदस्य सेवा कार्यालय मन्थलीका प्रमुख सूर्य थापा लगायत रहेका थिए ।
उक्त एकदिने तालिमा जिल्लाका करिब ३५/४० वटा सहकारी संस्थाहरुबाट सञ्चालक, व्यवस्थापक र कर्मचारीहरु गरी ६० जनाभन्दा बढीको सहभागिता रहेको रामेछाप जिल्ला बचत तथा ऋण सहकारी संस्था लिमिटेडका उपाध्यक्ष नवीन घिमिरेले जानकारी दिए ।
उक्त तालिमको सहजीकरण करदाता सेवा कार्यालय मन्थलीका कर अधिकृत प्रतिमा घिमिरे, नेफ्स्कुन सदस्य सेवा कार्यालय मन्थलीका प्रमुख सूर्य थापा, जिल्ला सहकारी सङ्घका अध्यक्ष हिमाल ढुङ्गेल, जिल्ला बचत सङ्घका अध्यक्ष जगन्नाथ दाहाल र पत्रकार नवराज पथिकले गरेका थिए ।