रामेछाप– रामेछाप प्रदेशसभा क्षेत्र नं. ‘ख’ बाट निर्वाचित बागमती प्रदेश सांसद युवराज चौलागाईले आफ्नो पहिलो महिनाको तलबबाट स्थानापति मध्यमिक विद्यालय मन्थली नगरपालिका–९ बाङ्गेसल्ला पुरानागाउँलाई ५० हजार रुपैयाँ सहयोग गरेका छन् । विद्यार्थीलाई खाना खर्च स्वरुप चौलागाईले आफ्नो पहिलो महिनाको तलबबाट ५० हजार रुपैयाँ विद्यालयलाई सहयोग गरेका हुन् । पहिलो महिनाको तलब आउनु पहिले नै सांसद चौलागाईले विद्यालयलाई रकम दिइसकेका छन् ।
विद्यालयको वार्षिकोत्सव तथा अभिभावक भेलामा प्रमुख अतिथिका रुपमा सहभागि भएका सांसद चौलागाईले ५० हजार रुपैयाँ सहयोग गरेको प्रधानाध्यापक शम्भु मण्डलले जानकारी दिए । जिल्लाको शैक्षिक गुणस्तरलाई प्राथमिकतामा राखेर काम गर्ने पनि सांसाद चौलागाईले बताएका छन् । विद्यालयले आगामी वार्षिक परीक्षा र एसईईलाई लक्षित गरि कक्षा ८ देखि कक्षा १० सम्मका विद्यार्थीलाई बिहान ७ बजेदेखि बेलुका ४ः३० बजेसम्म कक्षा सञ्चालन गर्दै आएको छ । बिहानको खाना समेत विद्यालयमै खुलाउँदै आएकाले विद्यार्थीलाई खाना खुवाउन सांसद चौलागाईले आर्थिक सहयोग गरेको प्रधानाध्यापक मण्डलले बताए ।
विद्यालय आर्थिक संकटमा रहेको बेलमा सांसद चौलागाईले गरेको सहयोगले ठूलो राहत मिलेको प्रधानाध्यापक मण्डलले बताए । यस अघिका सांसद र नेताहरुले कार्यक्रममा आएर भाषण गर्ने तर विद्यालयको लागि केही पनि नगरेको बताउँदै युवराज चौलागाई विद्यालयलाई प्रत्येक्ष सहयोग गर्ने पहिलो सांसद भएको पनि प्रधानाध्यापक मण्डलले बताए ।
कार्यक्रममा मन्थली नगरपालिकाका शिक्षा शाखा प्रमुख उपसचिव हेमन्तकुमार बुढाथोकी, मन्थली नगरपालिका वडा नं. ९ का अध्यक्ष गोकर्णराज आरण तथा छीमेकी विद्यालयहरुका प्रधानाध्यापकहरुको सहभागिता रहेको थियो ।
