रामेछाप विमानस्थल सञ्चालन गर्न पहल गर्छुः मन्त्री श्रेष्ठ

शनिबार, अशोज ८, २०७९ | onlinenews

Share this

सन्तोष ढुङ्गेल

रामेछाप– पर्यटन तथा नागरिक उड्डयान मन्त्री जीवनराम श्रेष्ठले रामेछाप जिल्लाको एक मात्र रामेछाप विमानस्थल स्थानीयले पनि उपयोग गर्न सकिने गरि सञ्चालनमा ल्याउन पहल गर्ने बताएका छन् ।
विमानस्थल निरीक्षण गर्न समिट एयरको बिमानबाट मन्थली आएका श्रेष्ठले स्थानीय नागरिकले पनि मन्थलीदेखि काठमाडौसम्म विमानमा जान सक्ने व्यवस्थाको लागि छलफल अगाडि बढाउने बताएका हुन् ।
अहिले पर्यटकहरू आउने सिजन भएकाले लुक्लालाई मात्र जोड गरेको र बन्दै गरेका संरचना चित्त बोझ्दो रहेको बताए ।
७ वर्षदेखि मन्थली–काठमाडौं उडान बन्द रहेको रामेछाप विमानस्थलबाट हप्तामा एक पटक भएपनि मन्थली–काठमाडौ उडान गर्न स्थानीयले मन्त्री श्रेष्ठसँग माग गरेका थिए ।

विमानस्थलको निरीक्षण पछि फर्कने क्रममा संक्षिप्त प्रतिक्रिया दिँदै मन्त्री श्रेष्ठले स्थानीयको माग सम्बोधन हुने गरि छलफल गर्ने बताए । मन्त्री श्रेष्ठले आन्तरिक तथा बाह्य पर्यटकको लागि आवश्यक क्यान्टिन तथा अन्य सुविधाका संरचना तत्काल निर्माण गर्न पनि निर्देशन दिएका छन् । कोरोना महामारीका कारण थलिएको पर्यटन व्यवसाय अक्टोबरदेखि पुनः सुचारु हुने समिट एयरले जनाएको छ । एयरले अक्टोबरदेखि रामेछाप विमानस्थलबाट लुक्लाको लागि नियमित उडान भर्ने जनाएको छ ।
गत वर्ष कोरोना महामारी अगाडिको सिजनमा तारा, समिट र सीता एयरले मन्थली– लुक्ला दैनिक ६० उडान गरेको तारा एयर रामेछापका स्टेसन इन्चार्ज प्रबिन सुबेदिले जानकारी दिए । कोरोनाका कारण रामेछाप विमानस्थल संचालन नभएपछि रामेछापका एक दर्जन भन्दा बढी होटल व्यवसायी विस्थापित भएका छन् ।