रामेछाप- ७१औँ प्रहरी दिवस–२०८३ को अवसरमा रामेछापमा आयोजित रक्तदान कार्यक्रममा १५ जना प्रहरी कर्मचारीले रक्तदान गरेका छन् । जिल्ला प्रहरी कार्यालय रामेछापले नेपाल रेडक्रस सोसाइटी जिल्ला शाखा रामेछापसँगको सहकार्यमा रक्तदान कार्यक्रम आयोजना गरेको हो ।
जिल्ला प्रहरी कार्यालय रामेछापमा कार्यरत विभिन्न दर्जाका १५ जना प्रहरी कर्मचारीले कार्यक्रममा रक्तदान गरेको जिल्ला प्रहरी कार्यालय रामेछापले जनाएको छ । रक्तदानबाट संकलित रगत आवश्यकतामा परेका बिरामीलाई उपलब्ध गराउन सहयोग पुग्ने अपेक्षा गरिएको छ ।
जिल्ला प्रहरी कार्यालय रामेछापका प्रमुख प्रहरी नायब उपरीक्षक सन्तुलालप्रसाद जैसवारको उपस्थितिमा कार्यक्रम सम्पन्न भएको थियो । प्रहरी दिवसको अवसर पारेर आयोजना गरिएको रक्तदान कार्यक्रमले सामाजिक सेवाप्रतिको प्रहरीको प्रतिबद्धता उजागर जिल्ला प्रहरी कार्यालय रामेछापका सूचना अधिकारी प्रहरी निरीक्षक कमल राउतले बताए । रक्तदान जीवन बचाउन सहयोग पुर्याउने महत्वपूर्ण सामाजिक कार्य भएकाले प्रहरी कर्मचारीको सहभागिताले मानवीय सेवाप्रतिको जिम्मेवारीसमेत दर्शाएको उनको भनाइ छ ।
रक्तदानलाई जीवन बचाउने महत्वपूर्ण सामाजिक कार्यका रूपमा लिइन्छ । दुर्घटना, शल्यक्रिया, प्रसूति तथा विभिन्न रोगका कारण रगत आवश्यक पर्ने बिरामीलाई समयमै रगत उपलब्ध गराउन यस्ता कार्यक्रमले सहयोग पुर्याउने अपेक्षा गरिएको छ । प्रहरी दिवसको अवसरमा आयोजित रक्तदान कार्यक्रमले प्रहरी संगठनलाई शान्ति सुरक्षा कायम गर्ने जिम्मेवारीसँगै सामाजिक सेवामा पनि सक्रिय बनाउने उद्देश्य राखेको छ ।
यसैबिच, जिल्ला प्रहरी कार्यालय रामेछापले ७१औँ प्रहरी दिवसको अवसरमा आगामी असोज ३० गते शुक्रबार विशेष कार्यक्रम आयोजना गर्ने जनाएको छ । दिवसका अवसरमा विभिन्न कार्यक्रममार्फत प्रहरी सेवाप्रति सम्मान व्यक्त गर्नुका साथै प्रहरी र नागरिकबीचको सम्बन्धलाई थप सुमधुर बनाउने लक्ष्य राखिएको कार्यालयले जनाएको छ ।
प्रहरी दिवसलाई संगठनको योगदान स्मरण गर्ने, कर्तव्यपालनका क्रममा प्रहरीले पुर्याएको सेवा र समर्पणको सम्मान गर्ने तथा नागरिकसँगको सम्बन्ध थप सुदृढ बनाउने अवसरका रूपमा मनाउने गरिन्छ । यस अवसरमा आयोजना गरिने कार्यक्रमले प्रहरीप्रति नागरिकको विश्वास अभिवृद्धि गर्न र सामाजिक सेवामा प्रहरीको सहभागिता बढाउन सहयोग पुग्ने अपेक्षा गरिएको छ ।
रक्तदान कार्यक्रममार्फत प्रहरीले समाजप्रतिको उत्तरदायित्व निर्वाह गर्ने सन्देश दिएको छ । शान्ति सुरक्षा कायम गर्नुका साथै मानवीय सेवाका गतिविधिमा सहभागी हुँदा प्रहरी र नागरिकबिचको सम्बन्ध अझ प्रगाढ बन्ने विश्वास गरिएको छ ।