दुई करोड नदिए छोरी मारिदिन्छु भनि गाउँपालिका अध्यक्षलाई धम्की दिने गुण्डा पक्राउ

शुक्रबार, साउन २४, २०७६ | onlinenews

Share this

काठमाडौं– गाउँपालिका अध्यक्षसँग दुई करोड रुपैयाँ माग गर्दै पैसा नदिए छोरी अपहरण गरेर मारिदिन्छु भनि धम्की दिने गुण्डा नाइके लोप्साङ भनिने मिलन लामालाई काठमाडौंको स्वयम्भूबाट प्रहरीले पक्राउ गरेको छ ।
दुई करोड रुपैयाँ नदिए गाउँपालिका अध्यक्षको छोरी अपहरण गरि मारिदने धम्की दिएको अभियोगमा लामालाई प्रहरीले खोजी गरिरहेको थियो ।
स्वयम्भू स्थित विजेश्वरी हाउजिङ नजिकै मिलन भएको सूचना पाएपछि प्रहरी टोली गएको थियो । सो स्थानमा प्रहरी पुग्दा प्रहरी टोलीलाई देख्नासाथ मिलन र मिलनसँगै रहेका अमृत तामाङ भागेका थिए । त्यसपछि प्रहरीले गोली चलाएको बुझिएको छ ।
प्रहरीको गोली लागेर घाइते भएका मिलन लामालाई दुई गोली लागेको छ । घुडामुनी दुई गोली लागेको उनको बीर अस्पताल ट्रमा सेन्टरमा उपचार भइरहेको छ ।
प्रहरीका अनुसार मिलनको साथमा रहेका अमृत तामाङ पनि पक्राउ परेका छन् । अमृत र मिलन दुवैजना लिखु तामाकोशी गाउँपालिकाका बासिन्दा भएको प्रहरीले जानकारी दिएको छ ।
अपराध महाशाखाका एसएसपी सहकुल थापाले दिएको जानकारी अनुसार रामेछापकै लिखु–तामाकोसी गाउँपालिका अध्यक्ष गोविन्द बहादुर खड्कालाई मिलनको टोलीले धम्की दिएको थियो । दुई करोड रुपैयाँ नदिए ‘छोरी अपहरण गरेर गोली हानिदिने’ धम्की मिलनले बारम्बार दिएको बताइएको छ ।
पैसा नदिए अध्यक्षको छोरी अपहरण गरेर मारिदिने धम्की आएपछि खड्काले प्रहरीलाई खबर गरेका थिए । एसएसपी थापाका अनुसार ‘पक्राउ गर्न खोज्दा भागेपछि गोली हानेर उनीहरुलाई प्रहरीले नियन्त्रणमा लिएको हो । उनीहरू गुण्डागर्दी र लुटपाटमा संलग्न रहेको प्रहरीले जनाएको छ ।