रामेछापमा गैसस महासंघ अब एउटामात्रै हुन्छः श्रेष्ठ

आइतवार, मंसिर ९, २०७५ | onlinenews

Share this

रामेछापः गैरसरकारी संस्था महासंघ नेपाल रामेछापका नवनिर्वाचित अध्यक्ष भुवनकुमार श्रेष्ठले अब रामेछाप जिल्लामा एउटामात्रै गैरसरकारी संस्था महासंघ हुने बताएका छन् ।
रामेछाप जिल्लामा गैरसरकारी संस्था महासंघ नेपाल र लोकतान्त्रिक गैरसरकारी संस्था महासंघ गरि दुई वटा महासंघ रहेको छ ।
लोकतान्त्रि गैरसरकारी संस्था महासंघ नेपाली काँग्रेसको भातृ संगठन भएको भन्दै अब “गैरसरकारी संस्था महासंघ नेपाल” नै आधिकारिक गैरसरकारी संस्था महासंघको रुपमा रहने अध्यक्ष श्रेष्ठले बताए ।
गैरसरकारी संस्था दर्ता गर्दा दिइने सिफारिस “गैरसरकारी संस्था महासंघ नेपाल” ले दिएको सिफारिस मात्र आधिकारिक हुने र गैसस महासंघ नेपाल बाहेकका महासंघले दिने गरेको सिफारिसलाई रोक्ने पनि उनले बताए ।
लोकतान्त्रिक गैरसरकारी संस्था महासंघसँग एकता गरी एउटै महासंघ बनाउनको लागि गैसस महासंघले पहल गर्ने पनि उनले बताए ।
गैसस महासंघ नेपालले सबै गैरसरकारी संस्थाहरुलाई समेत साथमा लिएर अगाडि बढ्ने र गैसस महासंघमा आवद्ध नभएका सामाजिक संस्थाहरुलाई महासंघमा आवद्ध गराउन अभियान चलाउने अध्यक्ष श्रेष्ठको भनाई छ ।
गैसस महासंघ नेपाल रामेछापको नवनिर्वाचित कार्यसमितिको पहिलो काम सामाजिक संघसंस्थाको समस्या सामाधान गर्नु हुने पनि श्रेष्ठले बताए । गैसस महासंघले रणनैतिक योजना निर्माण गरेर स्थानीय सरकार र सामाजिक संघसंस्थाहरुसँग हातेमालो गरेर अगाडि बढ्ने पनि अध्यक्ष श्रेष्ठले बताएका छन् ।
गैसस महासंघ नेपाल रामेछापको नवनिर्वाचित कार्यसमितिले आइतबार आयोजना गरेको पत्रकार सम्मेलनमा यस्तो बताएका हुन् ।
शनिबार सम्पन्न भएको गैसस महासंघ नेपाल रामेछापको अधिवेशनले भुवनकुमार श्रेष्ठ अध्यक्ष रहेको १३ सदस्यीय कार्य समिति चयन गरेको थियो ।
कार्यसमितिको अन्य पदाधिकारीहरुमा उपाध्यक्ष– रत्नप्रसाद कडेल, सचिव बलराम लामा, सह–सचिव गम्भीर बिक र कोषाध्यक्षमा लक्ष्मी श्रेष्ठ रहेकी छन् ।
त्यसैगरी सदस्यहरुमा चन्द्रबहादुर खाती, कर्ण विक, मुना कडेल, सर्मिला भण्डारी, दीपा थापा, नोर्बु योञ्जन, सोनु रोका, मिलनकुमार घिसिङ र यसोदा सुवेदी रहेका छन् ।