सिन्धुलीको खुर्कोट बजार फोहोरले अस्तव्यस्त

२१ जेष्ठ २०७४ सिन्धुली– नेपालकै १० नमूना शहर मध्य एक शहरको रुपमा विस्तार भइरहेको सिन्धुलीको खुर्कोट बजार फोहोर ब्यवस्थापन हुन नसक्दा दिनदिनै अवस्तब्यस्त बन्दै गएको छ ।
राजधानी काठमाडौसँग तराई र पूर्वि नेपाललाई समेत जोड्ने विपी राजमार्गमा रहेको खुर्कोट बजार फोहोरले दिनानुदिन विरुप बन्दै गएको हो ।
गोलञ्जोर गाउँपालिका–७ मा पर्ने खुर्कोट बजार शहरी विकास तथा भवन निर्माण विभागले नमूना शहर निर्माणको लागि काम गरिरहेको छ । झट्ट हेर्दा नारायघाट मुग्लिन बजारजस्तो देखिने खुर्कोटको माथिल्लो बजारमा सुविधा सम्पन्न होटल रेष्टुरेन्ट, होलसेल खाद्यन्न, हार्डवेयर, इलेक्ट्रिोनिक लगायतका व्यवसायहरु सञ्चालनमा छन् ।
खुर्कोट बजारमा अस्पताल, वैंक तथा वित्तीय संस्था, विद्यालय, इलाका प्रहरी लगायतका कार्यालयहरु समेत रहेका छन् । नयाँ शहर आयोजनाले खुर्कोटलाई नमूना शहरको रुपमा विकास गर्न कार्यालय नै स्थापना गरेर शहर विस्तारको कार्य गरिरहेको छ ।
आयोजनाले अति आवश्यक भौतिक पूर्वाधार सडक विस्तार एवं स्तरोन्नती, एकीकृत सरकारी कार्यालय भवन, खेलमैदान स्तरोन्नती, सार्वजनिक मञ्च, पार्क लगायतका संरचनाहरु निर्माण गरिरहेको छ ।
दीगो र व्यवस्थित नमूना बजार निर्माणको लागि ६ सय ७८ रोपनी जग्गा रोक्का गरि प्लानिङ्गको काम समेत आयोजनाले गरिरहेको छ । बजारमा उत्पन्न हुने फोहोरमैला र अस्थव्यस्तालाई व्यवस्थित गर्न बजार व्यवस्थापन समिति समेत गठन गरिएको भए पनि ब्यवस्थापन भने हुन सकेको छैन ।
बजारमा जथाभावि फालिएको विस्कुट, चाउचाउको खोल, पानीका रित्ता बोतल, प्लास्टिकका झोला लगायत विस्कुन सुकाएझै देखिने फोहोरले बजारको स्वरुप नै विगारेको छ ।
उता ढल निकासाको लागि बनाइएको नाली पनि फोहोरले भरिएर दुर्गन्धित भएको छ । नालीको ढल गन्हाएर बजारमा बसिसक्नु नभएको स्थानीय भोला न्यौपानेले बताउनुभयो । दिलबहादुर बस्नेतको भनाई पनि उस्तै छ । उहाँले भन्नुभयो– उसै त गर्मीको समय नालीको ढलको गन्धले रोग ब्यादी फैलने त्यतिकै डर छ ।
पानी पर्दा नालीमा जम्मा भएको दुर्गन्धित फाहोर बजार भरी जाने गरेको र हावा चल्दा प्लाष्टिकजन्य फोहोरहरु उडाएर अर्को ठाउँमा थुप्रिदा सिंगो बजार नै प्रदुषित बनाउने गरेको स्थानीय व्यापारी जितबहादुर श्रेष्ठले गुनासो गर्नुभयो ।
व्यवस्थापन समितिले बजारको फोहार ब्यवस्थापन गर्न चासो नदेखाएको स्थानीय ब्यापारिको आरोप छ । तर, ब्यस्थापन समितिको भने बजारबासीको लापरवाही र चेतनाको अभावको कारण व्यवस्थापनमा समस्या आएको गुनासो छ ।
फोहोर ब्यवस्थापन गर्न प्रयास गरिरहेका छौं तर डम्पिङ साइटको अभाव हुँदा व्यवस्थापन गर्न सकिएको छैन समितिका अध्यक्ष रामकुमार श्रेष्ठले हाम्रो अनलाइन न्यूजलाई भन्नुभयो ।
श्रेष्ठले निर्वाचित जनप्रतिनिधि, शहरी विकास आयोजना र स्थानीय व्यवसायिसँग छलफल गरेर चाँडै टुङ्गयाउने पनि वताउनुभएको छ । यसैगरी नव निर्वाचित वडा अध्यक्ष रोमबहादुर देवकोटा (सुवास) ले फोहोर व्यवस्थापनको काम आफ्नो पहिलो प्राथमिकता भएको भन्दै डेढदेखि दुई महिना भित्र दीगो व्यवस्थापन गरिसक्ने बताउनुभएको छ ।