देउवा नेतृत्वको सरकारले १३ लाख नागरिकलाई लालपूर्जा बिहिन बनाएको पौडेलेको आरोप

नवराज बि.क.

रामेछाप– बागमती प्रदेश सरकारका मुख्यमन्त्री डोरमणी पौडेलले प्रधानमन्त्री शेवहादुर देउवा नेतृत्वको सरकारले १३ लाख भूमिहीन नागरिकलाई लालपूर्जा पाउनबाट वञ्चित गराएको आरोप लगाएका छन् ।
खाँडादेवी गाउँपालिकाको सित्खा–गोगनपानी–धूलेबेसी–भदौरे–भोटनागी सडक कालोपत्रे आयोजना सडक खण्डको बुधबार उद््घाटन गर्दै मुख्यमन्त्री पौडेलले यस्तो बताएका हुन् । १३ लाख भूमिहीन व्यक्तिलाई लालपूर्जा दिने उद्देश्यका साथ प्रधानमन्त्री केपी ओली नेतृत्वको सरकारले गरेका कामलाई बदर गरेर भूमिहीनहरुलाई लालपूर्जा पाउनबाट बञ्चित गरेको पौडेलको आरोप छ ।
उनले भने, ‘भूमिहीन नागरिकलाई लालपूर्जा दिने अभियानमा यो सरकारले काम ग¥यो, सबै पूर्वाधार तयार गरेर जब लालपूर्जा बाड्न सुरु गर्ने बेला भयो काँग्रेस नेतृत्वको सरकारले भूमि व्यवस्था आयोग विघटन ग¥यो ।
‘हामी लालपूर्जा लिएर नागरिकका घरघरमा आउन तयार भइसकेका थियौँ, देउवा नेतृत्वको सरकारले आयोग नै विघटन गरिदिएकाले अब लालपूर्जा वितरणको काम सम्भव छैन’, उनले भने । अब देउवा नेतृत्वको सरकारले भूमिहीन नागरिकहरुको लागि काम नगर्ने उनको भनाई छ ।
यो सरकार जनादेशको सरकार नभई परमादेशको सरकार भएकोले जनताको हितमा काम गर्दैन, मुख्यमन्त्री पौडेलले भने । जनताको हितमा यो सरकारले काम गर्न चाहेको भए अहिले भूमि व्यवस्था आयोग विघटन गर्नु आवश्यक नरहेको उनको भनाई छ ।
आयोगले अहिलेसम्मको अवधिमा गरेका सबै कामको कुनै महत्व नरहेको भन्दै उनले त्यस कारण यो सरकार जनताप्रति कति संवेदनशील, उत्तरदायी र जिम्मेवार छ भन्ने कुरा स्पष्ट देखिने बताए । अब विगतका सरकार, प्रधानमन्त्री ओली नेतृत्वको सरकार र भोलिको सरकारबीचको भिन्नता विस्तारै देखिँदै जाने पौडेलको भनाई छ ।
यस्तै, प्रदेश सरकारले विकासलाई अनिवार्य सर्त मानेर समान विकासको अवधारणाका साथ विकास निर्माणको काम गरिरहेको मुख्यमन्त्री पौडेलले बताए । प्रदेश सरकारले तीन वर्षको अवधिमा असाधारण काम गरेको पनि उनले दावि गरे । कोरोनाको महामारी, ठेकेदारको बद्मासीका बीचमा पनि प्रदेश सरकारले धेरै विकास गरेको उनको दावि छ ।
यसैबीच, वागमती प्रदेशका आर्थिक मामिला तथा योजनामन्त्री कैलाश प्रसाद ढुङ्गेलले एमाले नेतृत्वको सरकार विना देशको विकास सम्भव नहुने दाबी गरे । ढुङ्गेलले प्रधानमन्त्री ओली नेतृत्वको सरकारले तीन वर्षको अवधिमा रामेछाप जिल्लामा मात्रै ६४ किलोमिटर सडक कालोपत्रे गरेको बताए । एमाले नेतृत्वको प्रदेश सरकाले गरेका काम देखेर विपक्षीहरुको टाउको दुःखेको ढुङ्गेलेको भनाई छ । यस्तै, भौतिक पूर्वाधार विकास मन्त्री रामेश्वर फुयालले अहिले कोरोनाविरुद्धको खोपलाई मुख्य प्राथमिकतामा राखिएको बताए । साथै, भौतिक विकास निर्माणको कामलाई सँगसँगै अघि बढाउने उनले बताए ।