रामेछापमा वामगठबन्धनको प्रतिस्पर्धी नै छैनः मन्त्री श्रेष्ठ

२० कार्तिक २०७४

विनाविभागीय मन्त्री, नेकपा माओवादी केन्द्रका पोलिटब्यूरो सदस्य तथा वामगठबन्धनको तर्फबाट रामेछापका प्रतिनिधिसभाका साझा उम्मेदवार श्यामकुमार श्रेष्ठले रामेछाप जिल्लमा वामगठबन्धनको प्रतिस्पर्धी नै नभएको बताए ।  प्रस्तुत छः श्यामकुमार श्रेष्ठ ‘कुशल’सँगको कुराकानी

यहाँ प्रतिनिधिसभाको उम्मेदार, अहिले चुनावि अभियानमा हुनुहुन्छ कस्तो पाउँनुभएको छ माहौल ?

 प्रतिनिधिसभा र प्रदेशसभा निर्वाचन अन्तर्गत पहिलो चरणको निर्वाचन मंसिर १० गते हुदैछ । पहिलो चरणमा निर्वाचन हुने ३२ जिल्लामा जस्तै रामेछाप जिल्लामा पनि नोमिनेसनको क्रम सकिएको छ । हामी नेकपा एमाले र नेकपा माओवादी केन्द्रबीच संयुक्त वामपन्थी प्यानलकै रुपमा जनताको बिचमा गएका छौं । जनतामा एक प्रकारको उत्साह, जिज्ञासा, आशा, भरोसा र उल्लासपूर्ण वातावरण बनेको छ । निर्वाचनलाई जनताले एक प्रकारको पर्वको रुपमा लिएको अनुभूति भइरहेको छ । रामेछापको बामगठबन्धनको तर्फबाट संयुक्त चुनावि अभियान चलिरहेको छ । जिल्लाका ६४ वटै वडामा हामीले कार्यक्रम प्रक्षेपण गरेका छौं । प्रतिनिधि सभाको केन्द्रिय स्तरको कार्यक्रम जिल्लाको १३ वटा र ६४ वटै वडा स्तरमा जनसभा र कोणसभा गर्ने, गठबन्धनको तर्फबाट अगाडि सारिएका मुद्दाहरुलाई जनताको बीचमा पु¥याउने, संयुक्त घोषणापत्रको बारेमा जनताहरुलाई सुसुचित गराउने र विगतमा भए गरेका तथा हुन नसकेका कामको बारेमा जानकारी लिने र आगामी पाँच वर्षभित्रमा रामेछापको समग्र विकास निर्माण, आर्थिक समृद्धि, सुशाशन लागयतका योजनाहरुलाई कसरी कार्यान्वयन गर्छौ भन्ने कुरालाई प्रष्ट््याउन हामी चुनावी अभियानमा लागिसकेका छौं ।

यहाँको पार्टीभित्र असन्तुष्टिहरु देखियो र बाम गठबन्धनको बिरुद्धमा स्वतन्त्र उमेद्धारी पनि दिइयो । यद्यपी अहिले उमेदवारी फिर्ता गरिसकेको अवस्था छ । तर असन्तुष्ट पक्षले यहाँको उमेदवारीमा कस्तो असर पार्ला ?

उमेदवारीको विषयलाई लिएर पार्टीभित्रै प्रतिस्पर्धा देखिए पनि पार्टीबाट आधिकारिक उमेदवारको निर्णय नहुञ्जेलसम्म प्रतिस्पर्धा हुन्छ, यसलाई स्वभाविक मान्नु पर्छ । पार्टीभित्र छलफल हुन्छ र छलफलकै बीचबाट नँया निर्णयसम्म पुगिन्छ । औपचारिक बैठक बसेर जिल्ला पार्टीको तर्फबाट हामीले  प्रतिनिधि सभा र प्रदेशसभाको आकांक्षी साथीहरुको बिषयबस्तुहरु उपल्लो प्रदेश कमिटि र केन्द्रिय कमिटिमा पठाइसकेका थियौं । सघन छलफलको बीचबाट पार्टीले जुन निर्णय लियो त्यसपश्चात प्रतिस्पर्धाको रुपमा रहनुभएका साथीहरु देखापर्नु भएन । तर, जस्ले प्रदेशसभा भनिरहनु भएको थियो उहाँहरुले बाम गठबन्धनको बिरुद्धमा स्वतन्त्र उम्मेदवारी दर्ता गर्नुभएको थियो । उहाँहरुले दिनुभएको उम्मेदवारीलाई पनि सहज किसिमले कार्तिक ८ गतेनै फिर्ता लिइसक्नु भएको छ र अहिले सिंगो पार्टी एकढिक्का भएर निर्वाचनमा होमिएको अवस्था छ । बामगठबन्धनको तर्फबाट साझा उमेदवारको रुपमा प्रदेशसभाको उमेदवारहरु शान्तिप्रसाद पौडेल र कैलाशप्रसाद ढुङ्गेल साथै प्रतिनिधि सभामा म स्वयंम गरि तीनै जना निर्वाचनका कार्यक्रममा गइरहेका छौं । दुइवटै पार्टीले हामीलाई साझा उमेदवारको रुपमा खडा गरेको छ । मलाई के लाग्छ भने– कतिपय असन्तुष्टि हुन सक्छन्, असन्तुष्टि हुन्छन् पनि, सबैजना सन्तुष्ट हुन सक्छन् भन्ने कुरा होइन । तर पनि असन्तुष्टिका बीचमा सन्तुष्ट पार्ने उपाय के हो ? भनि पार्टीभित्र व्यापक छलफल भयो । छलफलको माध्यमबाट समस्या किनारा लागिसकेको छ । हामी चट्टानी एकतासहित बामशक्ति अगाडि लागिसकेका छौं । नेकपा एमाले र नेकपा माओवादी केन्दबीच चुनाबी तालमेल गरि अगाडि बढ्ने सन्दर्भमा हामीले ३ वटा निर्वाचन परिचालन समिति गठन गरेका छौं । एउटा प्रतिनिधिसभा निर्वाचन परिचालन समिति क.देवशंकर पौडेलको नेतृत्वमा निर्माण गरेका छौं भने प्रदेश सभा ‘क’ मा प्रेमकुमार कार्कीको संयोजकत्वमा बनाएका छौं । त्यसैगरी प्रदेशसभा ‘ख’ मा टंकलाल घिसिङको नेतृत्वमा चुनाव परिचालन समिति गठन गरिसकेका छौं । बामपन्थी गठबन्धनको तर्फबाट अगाडि सारिएका उम्मेदवारहरुले भारी मतले जित्नुपर्छ, जीताउनु पर्छ भनि सविस्तारीत रुपले कार्यक्रमहरु अगाडि बढिसकेको छ । अब यो चुनावि कार्यक्रम रामेछापको गुम्देलदेखि गौश्वारासम्म सुनामि छालझै अगाडि बढ्ने छ । र, कतिपय ठाउँहरुमा भइसकेको पनि छ ।

दुई ठूला कम्युनिष्ट पार्टीहरुको बीचमा बामतालमेल भएसँगै असन्तुष्ट नेता कार्यकर्ताले आ–आफ्नो नेतालाई मात्र मतदान गर्ने कुरा सर्वत्र छ ।यहाँले भने जस्तै दुवै पार्टी एकैढिक्का भएर लागेकै छ त ?  

कतिपय सन्दर्भमा निर्वाचनका बेला घात अन्तर्घात हुन्छ भन्ने हामीले सुनेका थियौं । हामी कम्युनिष्ट शक्तिहरु हौं, हामीले कसम खाएका छौं र प्रतिबद्धता पनि जाहेर गरेका छौं । गाँउ स्तरका कमिटिहरुमा सुर्कलर पनि गरेका छौं र अहिलेको बामगठबन्धनको तर्फबाट अगाडि सारिएका उम्मेदवारहरुको हकमा दुईवटै पार्टीले यसलाई एउटा प्रतिष्ठाको रुपमा पनि लिएको छ । त्यसोे हुनाले अहिले चियागफमा, चोक–चोकमा गल्लीहरुमा हुने छलफल सहायक कुरा हुन् । मूलभूत रुपमा पार्टीको तर्फबाट अहिले भारी मतका साथ निर्वाचन जित्ने र चट्टानी एकताका र प्रतिबद्दताका साथ हामी अगाडि बढेका छौं । असन्तुष्टिका स्वरहरु मथ्थर भइसकेका छन् र हामीले त्यो कुराको निदान गरिसकेका छौं ।

बिगतमा पनि रामेछापमा कम्युनिष्ट शक्तिहरुले तालमेल गरेकै हुन् त्यसबेला हारेका उदाहरण पनि छ, यो तालमेल पनि पूरानै तालमेलजस्तै हुने हो कि ? 

बिगतको तालमेल भनेर तँपाइले २०५६ सालतिरको कुरा गर्नुभएको होला तर त्यतिबेलाको तालमेलको सन्दर्भ परिस्थिति, बस्तुगतस्थिति राजनीतिक प्रणालीसँग सम्वन्धित् तालमेलको सन्दर्भमा त्यो अलि फरक र भिन्न प्रकृतिको थियो । तर, अहिलेको तालमेल बामपन्थी धारहरुबीचको पार्टी एकता गर्ने र नेपालमा साना–साना पार्टीको रुपमा रहेका क्रान्तिकारी शक्तिहरु जुन–जुन स्थानमा छन् सबै शक्तिहरुलाई एकताको शुत्रमा बाँध्ने र बामपन्थीहरु जाँहा जुन अवस्थामा छन्, छिन्न भिन्न भएर बस्दा जनताले पनि दुःख पाए र देशले पनि दुःख पायो । नेपाल राष्ट्र र जनताको लागि अहिले दुई तिहाईजति जनमतलाई अब हामीले नेतृत्व गर्ने उद्देश्य सहित तालमेल भएको छ । विसुद्ध निर्वाचनका निम्ती मात्र नभई यो पार्टी एकता गर्ने दृढता सहित तालमेल गरेका हांै । बिगतको दिनमा भएका तालमेलको पुनारबृत्ति त हुने हैन भन्ने जुन जिज्ञासा प्रकट गर्नु भयो, अहिलेको सन्दर्भमा त्यतिखेरको परिस्थिति र समयमा आकाश जमिनको फरक छ । अहिलेको सन्दर्भ भनेको के हो भने कम्युनिष्ट पार्टीहरुमा एउटै झण्डामुनी एउटै पार्टी निर्माण गर्ने ध्ययका साथ चुनावि तालमेल, गठबन्धन र कार्यगत एकता भइरहेको छ । बिगतमा जस्तो होइन, बिगतको दिनमा हार मात्र होइन जित पनि भएको थियो । ४८ सालको इतिहास हेर्नुहुन्छ भने जीतेको पनि छ हारेको मात्र त छैन नि । २०७० सालमा एकल उम्मेदवारी दिंदा पनि मलाई जनताले जिताउनु भएकै हो । अहिले चुनावी तालमेल मात्र होइन, नेपाली समाजलाई समाजवादमा पु¥याउने लक्ष्य सहित हामी कम्युनिष्टहरु एक भएर अगाडि बढ्न चाहिरहेका छौ । र,  यसमा कुनै शंका गर्नु जरुरी छैन । अहिले बामपन्थीको तालमेल र गठबन्धन भनेको यसलाई कम्युनिष्ट पार्टीहरुको गठबन्धनको रुपमा पनि बुझ्न जरुरी छ ।

वामपन्थी गठबन्धनसँग रामेछापलाई समृद्ध बनाउने एजेण्डा के छ ?

देशको समृद्धि सहितको एजेण्डा समावेश गरेर केन्द्रबाट बामगठबन्धनको संयुक्त घोषणा पत्र जारी गरिएको छ । जिल्लाको सन्दर्भमा हामीले संयुक्त प्रतिबद्धता पत्र भनेका छौं । राष्ट्रिय स्तरमा आगामी पाँच बर्ष सम्ममा गठबन्धनको तर्फबाट के काम गर्न सकिन्छ ? त्यो राष्ट्रिय स्तरबाट केन्द्रिय गठबन्धनको घोषणापत्र आएको छ र जिल्लामा पनि हामीले गठबन्धनको तर्फबाट प्रतिबद्धता पत्र तयार गरेका छौं ।  रामेछापको सुख्खाग्रस्त ठाँउहरुमा ग्रिनरीको अवधारणा अनुसार हामी अघि बढ्नेछौं । जिल्लाको मेरुदण्डको रुपमा स्थापित सडकहरुलाई पहिले परिभाषित गरिएझैं डिटिएमपिको रुपमा अन्र्तजिल्ला, अन्र्तर गाँउपालिकाहरु, अन्र्तर नगरपालिकाहरु जोड्ने क्षेत्रीय र राष्ट्रिय स्तरका सडकहरु छन् त्यस्ता खालका सडकहरुलाई कालोपत्रे गर्ने ।  भौतिक संरचनाको विकास गर्ने । त्यस्तै शिक्षा, स्वास्थ्य र रोजगारीको अवसरहरु सिर्जना गर्ने, रामेछाप जल सम्पदाको अपार लिखु करिडोर, खिम्ती करिडोर, तामाकोशी करिडोर र सुनकोशी करिडोर अन्र्तगत जलाशय युक्त स्थानमा हाइड्रोप्रोजेक्टको रुपमा जनताको पक्षमा जनताकै आर्थिक सम्बृद्धिको बाटोलाई त्यसमा जोडेर हामीले कार्यक्रम प्रक्षपण गरेका छौं । र, यसलाई राष्ट्रिय गौरबको आयोजनाको रुपमा निर्माण सम्पन्न गर्ने, कार्यान्वययन गर्ने र जनतालाई लगानीमैत्री वातावरण निर्माण गर्दै सबै लगानीकर्तालाई एकठाँउमा ल्याउनेतर्फ हाम्रो ध्यान केन्द्रित भएको छ । जिल्लाका दुर्ईवटै प्रदेशमा सुरु गरिएको कृषिलाई आधुनिकीकरण गर्ने कार्यक्रमको  बृद्धि र विस्तारतर्फ पनि हामीले ध्यान केन्द्रित गरेका छौँ । यो सँगसँगै जिल्लाको प्रदेश नम्वर १ मा गुम्देलको ल्हाछ्योर र महालंगुर हिमाल लगायतका हिमश्रृखलाहरु र प्रदेश नं २ को शैलुङ्गलाई आधार मानेर पर्यटनको विकास गर्नेतर्फ पनि हामी दृढ छौँ । रामेछापको दुई नगरपालिका सहित आठवटा स्थानीय तहका मुकामहरुलाई माइक्रोसिटिको अवधारणाको आधारमा आगामी पाँच वर्षमा साना मोडेल शहरको रुपमा स्थापित गराउने कार्यक्रम प्रक्षेपण गरेका छौँ । त्यो कार्यक्रम सम्पन्न गर्न र कार्यान्वयन गर्ने संगसँगै जिल्लामा रहेको खानेपानीको अभावलाई कसरी पूर्ति गर्न सकिन्छ भनि कार्यक्रम सार्वजनिक गरेका छौं । केहि बर्षपछि रामेछापबासीको शुद्ध पिउने पानीको नैसर्गिक र मौलिक अधिकारलाई सुनिश्चित गर्न हामीले कार्यक्रमलाई अघि सारेका छौ र गुणस्तरीय शिक्षाका लागि आठवटै स्थानीय तहमा प्राविधिक शिक्षा सहितको गुणस्तरीय शिक्षा र कलेजहरु सञ्चालनमा ल्याउने हाम्रो लक्ष्य रहेको छ । जिल्लाका आठवटै स्थानीय तहमा तीस शै्यासम्मको स्वास्थ्य केन्द्रको स्थापना गरेर अघि बढ्ने लक्ष्य अनुरुप अघि बढेका छौ र त्यसलाई पनि हामी पूरा गर्नेर्छौ ।जिल्लाको मेरुदण्डका रुपमा रहेको सदरमुकाम मन्थलीदेखि गुम्देल हुँदै ल्हाछ्योरसम्म र शैलुङ्गसम्मको बाटोलाई कालोपत्रे गर्ने दृष्टिकोण सहित कार्यक्रम अघि सारेका छौं र त्यही अनुसार अघि बढ्छौं । रामेछापमा सु–शाशन र भ्रष्टाचार मुक्त समाज निर्माण गर्ने अभियानलाई पनि  तीब्रता दिनेछौं ।

विगतको मतलाई हेर्दा रामेछापमा बामगठबन्धन नै अगाडि देखिन्छ । यद्यपि नेपाली काँग्रेसका उम्मेदवारको निकै चर्चा परिचर्चा छ, पैसाले चुनाव जित्छ भन्ने । यहाँहरुमा पनि त्यो त्रास चाँहि छ होला हैन ?

पैसाले चुनाव जित्ने भए अहिले बिश्वमा बिल गेट्सले नै चुनाव जित्नु पर्ने हो नि । नेपालको कुरा गर्नुहुन्छ भने कति ठूला–ठूला अमिरपतिहरु छन् नि । किन तिनले उठाएका प्रतिनिधिहरुले बारम्वार चुनाव हारिरहेका छन् ? यसबाट के बुझिन्छ भन्दा पैसाले चुनाव जित्ने होइन । पैसा कसरी आउँछ, कसरी कमाउँछ र कसरी कमाइरहेको छ ? यो रामेछापबासीलाई राम्रोसँग थाहा छ । त्यसैले पैसा बढि खर्च गरेर, पैसा दिएर, पैसाले भोट किनेर साध्य पनि छैन । त्यो संभव हुने कुरै होइन । संगठनको बलमा, जनताको बलमा, समर्थक शुभ–चिन्तकको बलमा, कार्यकर्ताको बलमा आफ्ना कार्यक्रमहरुको बलमा जनताको निम्ती समर्पण भावसहित राजनीतिमा लागेको ब्यक्तिले जित्ने हो चुनाव । उम्मेदवार जनताको निम्ती समर्पित राजनीतिककर्मी हो या होइन भन्ने कुरा जनताले राम्रोसँग छुट्टाएका छन् ।  पञ्चायति कालरात्रीको समय जस्तो पञ्चायतकालिन व्यवस्थामा त जनताहरु सचेत थिए भने अहिले त संघीय लोकतान्त्रिक गणतन्त्रको समयमा छौं । जनताले राम्रोसँग बुझेका छन् । धेरै खर्च गर्ने मानिसहरुले हार व्यहोर्नु परेको स्थिति पनि छ । त्यसैले पैसा दिएर, पैसा खर्च गरेर, विभिन्न प्रलोभनमा पारेर कसैले चुनाव जित्छु भन्ने परिकल्पना गरेको छ भने त्यो कोरा कल्पना मात्र हो । रामेछापबासी जनताको अभिमत खरिद गरेर पैसाले किनेर म चुनाव जित्छु भनेको छ भने त्यो सहि अर्थको जनताका प्रतिनिधि हुनै सक्दैनन् । अहिले निर्वाचन आचारसंहिता लागू भएको छ । निर्वाचन आचारसंहिताले टिसर्ट समेत छाप्न पाईदैन, क्याप समेत लगाउन बन्देज गरिएको छ । हामीले पम्प्लेट मात्र बनाउँदा पनि त्यसको साइज दिइएको छ । तुल ब्यानरहरु समेत बनाउन पाँईदैन । निश्चित मापदण्ड सहित निर्वाचन आयोगले आचारसंहिता बनाएको छ । आचारसंहितालाई दृढतापूर्वक कार्यान्वयन नगर्ने उम्मेदवाहरुको उम्मेदवारी समेत खारेज हुने स्थिति छ । त्यसो भएको हुनाले म के निवेदन गर्न चाहन्छु र प्रश्ट पार्न चाहान्छु भने रामेछापका जनतालाई कोहिकसैले एकदुई हजार दुईचारहजार पैसा दिएर जनताको अभिमतलाई किन्छु भन्छ भने त्यो दुष्टता कसैले नगरे हुन्छ । त्यो सोच भनेको मुर्खताको सोच हुन्छ । त्यसैले जिल्लावासी जनताको मत किनेर म बिजयी हुन्छु भन्ने कसैले ठानेको छ भने त्यो कोरा कल्पना मात्रै हो । कसैले पनि अहिले पैसाको बलमा आफ्नो अभिमत बेच्न चाहँदैन । जनताको बीचमा जाँदा उम्मेदवारहरुले के–के कुरा अगाडि लिएर आएका छन् ? हरेक क्षेत्रबाट रामेछापलाई समृद्ध रामेछाप, समुन्नत रामेछाप, सुन्दर रामेछाप र रामेछापका जनताहरुको रोजीरोटीका प्रश्नका कुराहरु आर्थिक समृद्धि, सामाजिक न्यायसँग सम्वन्धित् कुराहरु, शिक्षा, स्वास्थ्य तथा रोजगारीसँग अन्र्तसम्वन्धित कुराहरु र स्रोत, साधनहरुलाई कसरी परिचालन गर्न सक्छन् हाम्रा प्रतिनीधिहरुले ? समग्र बिकासको लागि कत्तिको दखलता राख्न सक्छन् ? कति क्षमता छ ? कति क्षमता प्रर्दशन गर्न सक्दछ ? भन्ने जनताले यत्तिकै पनि बुझेका छन्  । म यसमा धेरै टिका टिप्पणी गर्न चाहन्न । अहिले रामेछापका जनताले भोट पैसामा खरिदबिक्रि गर्न चाहादैनन्, गर्दैनन् र भोट बिक्री गर्ने कुरा पनि होईन ।

प्रत्यक्षमा त यहाँहरु तिनजना साझा उम्मेदवार भई नै हाल्नु भयो । तर समानुपातिकमा त छुट्टाछुट्टै उम्मेदवार छन् । समानुपातिक ओझेलमा परेको जस्तो देखिएको छ । मतदान प्रक्रियामा पनि त्यसले जनतामा केहि अन्यौलताहरु सिर्जना गर्छ कि ? भोट काँहा हाल्ने कसलाई दिने भन्नेमा ? 

त्यसमा पनि कुनै दुविधा पाल्नै पर्दैन । अहिले केहि प्राविधिक त्रुटिका कारण मात्रै हो नत्र हामी बामगठबन्धनको तर्फबाट एउटै चुनाव चिन्हमा लड्ने कुरा थियो । प्राविधिक कारणले अहिले एउटै चुनाव चिन्ह लिएर लड्न सकिएन । प्रत्यक्षतर्फको एउटा मतपत्र हुन्छ । प्रदेश सभा र प्रतिनिधि सभाको दुईवटा भोट हाल्ने हो । प्रतिनिधि सभाको उम्मेदवारको लागि जो उठेको ? उसैको चिन्ह हुन्छ । प्रदेश सभामा उठ्ने उम्मेदवाको चिन्ह जुन हो त्यहि नै हुन्छ । त्यसैले यसमा दुविधामा पर्ने खास कुरै छैन । दोस्रो कुरा समानुपातिकको सन्दर्भमा एउटै मतपत्र हुन्छ । जँहा तल र माथि प्रदेशसभा र प्रतिनिधि सभा भनिएको हुन्छ । आफ्नो इच्छाइएको मत दिइन्छ । हामी समानुपातिक र प्रत्यक्ष मिश्रित निर्वाचन प्रणालीमा गएका छौ । संवैधानिक रुपले त्यहि व्यवस्था छ । मिश्रीत निर्वाचन प्रणाली भनेको समानुपातिक र प्रत्यक्ष दुइवटै व्यवस्था हो । पहिलो भनेको निर्वाचित हुने प्रणाली, त्यसपछि गएर समानुपातिक निर्वाचन प्रणाली हुने हो । दुईवटा मतपत्र हुन्छ । जनता त्यस्तो भ्रममा छैनन् किनकी जनताले यस अघिका निर्वाचनमा पनि समानुपातिकमा मत हालिसकेका छन् ।  अहिले दुविधा हुन्छ कि ? भ्रम हुन्छ कि ? भन्ने कुरै छैन । बामगठबन्धनको तर्फबाट प्रत्यक्षतर्फ मलाई भोट दिनुहुन्छ । जहाँ चुनाव चिन्हको रुपमा गोलाकार भित्रको हँसिया हथौडा रहेको छ । प्रदेश सभाको ‘क’ मा शान्तिप्रसाद पौडेल हुनुहुन्छ सूर्यमा भोट गर्नुपर्छ । प्रदेश नं २ मा कैलाशप्रसाद ढुङ्गेलको पनि समान चुनाव चिन्ह सूर्य नै रहेको छ । हामी प्रतिनिधि सभामा गोलाकार भित्रको हँसिया हथौडा र प्रदेश सभामा सूर्यमा । समानुपातिकमा पनि त्यसै गरी आ–आफ्नै चुनाव चिन्हमा मतदान गर्ने हो । त्यसैले याँहा भ्रम पाल्नु पर्ने कुरा छैन र भ्रमित हुने कुरा पनि छैन । स्पष्ट नै छ ।

रामेछापमा वामगठबन्धनको अवस्था कस्तो छ । उम्मेदवारले जित्छौ त भन्नै पर्छ । वास्तविकता चाहिँ के हो ?  

रामेछापको सन्दर्भमा प्रतिस्पर्धा नै होइन । बामगठबन्धनको बिरुद्ध अर्को प्रतिस्पर्धीको रुपमा भनिएको छ, प्रतिस्पर्धी होइन । आफ्नो पहिलेको मतको संरक्षण गर्नेसम्म हो तर गठबन्धनको प्रतिस्पर्धी होइन ।

 भनेपछि वामगठबन्धन चुनाव जित्नेमा ढुक्क छ ?

त्यसमा कुनै शंकै छैन । यसो हुन्छ कि उसो हुन्छ कि भन्ने ठाँउ नै छैन । अरु पार्टीहरुको कुल मत हिसाब गर्ने हो भने २७ हजार मात्र छ । बाम गठबन्धनको मत हेर्नुहुन्छ भने ६० हजारको हाराहारीमा छ । प्रतिस्पर्धाको दृष्टिकोणले हेर्नुहुन्छ भने यो कुनै प्रतिस्पर्धा नै होइन । तर के हुन्छ भने राजनीति र बहुपार्र्टी पद्दतिमा आएपछि पार्टीहरुले आफ्नो भोटको संरक्षण गर्नका लागि उम्मेदवार खडा गर्ने हुन्छ । त्यसैले रामेछापको सन्दर्भमा प्रतिस्पर्धीको रुपमा लिएको छुइन । गठबन्धनइतरको प्रतिस्पर्धी शक्ति छ भन्ने हाम्रो दृष्टिकोण छैन ।

यहाँको कुरा अनुसार सना पार्टी हिसावमा नआउ सक्छन् तँपाईहरु जो ठूला पार्टीहरु हुनुहुन्छ । निर्वाचनको बेला सँधै उठ्ने कुरा के हो भने राजनैतिक दलहरुले आचारसंहिता उल्लंघन गर्छन् । के हो त कुरा ? 

तँपाई र आममतदाता लाई म प्रष्ट पार्न चाहान्छु ,  त्यसैगरी विभिन्न सञ्चार माध्ययमबाट सूचना लिनुहुने सम्पूर्णलाई म बुझाउन चाहान्छु । म यतिखेर नेपाल सरकारको राज्यमन्त्रीको हैसियतमा पनि छु । आचारसंहितालाई दृढतापूर्वक कार्यान्वययन गर्नुपर्दछ । त्यो आचारसंहिता उल्लंघन भयो भने त्यो ठिक दिशामा पुग्छ भन्ने कुरा होइन । प्रतिनिधि सभाको उम्मेदवारले ४ वटा हल्का गाडीहरुको प्रयोग गर्न पाउने व्यवस्था छ । त्यस्तै दुई पांङ्ग्रे सवारी पनि प्रयोग गर्न पाउने व्यवस्था छ । निर्वाचन आचारसंहिताको परिधिमा रहेर हामी निर्वाचनका कार्यक्रमहरु सञ्चालन गरिरहेका छौं । कसैले निर्वाचन आचारसंहिताको उलंघन गरेको छ भने पनि त्यो निर्वाचन आचारसंहिताको वारेमा निर्वाचन आयोगले त्यसको लेखाजोखा गर्नेछ । कसैले निर्वाचन आचारसंहिता उलंघन गर्छ भने दायरामा ल्याउनु पर्दछ । हामीले गरेछौ भने पनि हामीे कानूनी कठघरामा पुग्नु पर्दछ । र, उभिन तयार छौ हामी । यदि कसैले आचारसंहिता उल्लंघन गर्छ भने मान्न सकिने स्थिति हुदैन ।

प्रतिनिधिसभा उम्मेदवारको हैसियतले आफ्ना मतदातालाई भन्नुपर्ने कुरा केही छ ? 

रामेछापबासी आमाबुवा, दाजुभाई तथा दिदीबहिनीहरु, शिक्षक, बुद्धिजीवी, बिज्ञ, प्राज्ञ व्यक्ति ब्यक्तित्वहरु, नागरिक समाजका अगुवा तथा अभियान्ताहरु, शिक्षक विद्यार्थीहरु सबै साथीहरु, किसान, हली गोठाला र श्रमजीवि सबैप्रति म अपिल गर्न चाहान्छु । २०७० सालको निर्वाचन संविधान लेखनका लागि थियो । ७० सालमा रामेछाप जिल्लाको क्षेत्र नंम्वर २ मा मेरो आफ्नो उम्मेदवारी हाम्रो पार्टीको तर्फबाट अगाडि सा¥र्यो । तँपाइहरुले मलाई जिम्मेवारी दिएर पठाउनु पनि भयो । मैले त्यतिवेला चुनावी दर्रवियानमा भनेको थिएँ, म संविधान निर्माणको लागि उम्मेदवार भएको हो । संविधान निर्माण गरेर फर्कने छु । मैले रामेछापबासी जनतालाई त्यो प्रतिबद्धता जाहेर गरेरको थिए । मलाई विजयी गराउँनु पनि भयो । अहिले संविधान निर्माण गरेर नेपालमा नँया राज्य व्यस्थाको परिकल्पना सहित हामी अगाडि आएका छौं । संबैधानिक व्यवस्थाहरु संविधानतः हामीले जनताका अधिकारहरुलाई सुनिश्ति गरेका छौ । संविधान लेखेर हस्ताक्षर गर्ने कर्तामा फेरि मलाई एक–पटक बामगठबन्धनको तर्फबाट अगाडि सारेको छ । मैले संविधान निर्माण गरेर आएको छु । संविधान कार्यान्वययन गर्ने पहिलो खुड्किलोको रुपमा अहिलेको निर्वाचन हुँदैन छ । संविधान बनाउने जिम्मेवारी सहित म पहिले निर्वाचित भएको थिँए । संविधान निर्माण गरेर आँए । अपवादका अधिकारहरु भन्दा बाहेक सबै अधिकारहरु लिपिबद्ध भएको छ । हिजो म २ नं क्षेत्रबाट निर्वाचित भएको थिँए भने अहिले नँया संरचना अनुसार रामेछाप जिल्लाको प्रतिनिधि सभाको निम्ती एउटै मात्र निर्वाचन क्षेत्र भएको छ ।  अहिले जिल्लामा प्रतिनिधिसभाको उम्मेदवारको रुपमा मलाई  वामगठबन्धनले अगाडि सारिएको छ । त्यसैले म लगायतको मेरो प्यानल प्रदेश सभाका सदस्यका उम्मेदवार द्धय प्रदेशसभा ‘क’ मा शान्तिप्रसाद र प्रदेशसभा ‘ख’ का कैलाशप्रसाद ढुङ्गेललगायत हामी तीनै जना अहिले चुनावी मैदानमा छौं । हिजोको दिनमा जे प्रतिबद्धता जाहेर गरेर गएको थिए त्यो आशा, भरोसालाई मैले मर्न दिइन । हिजो संविधान लेखन गरेर आएँ र भोलीका दिनमा फेरि कार्यान्वयन गर्नेछु । मलाई दृण बिश्वास छ,रामेछापेली जनताले म लगायत बामगठबन्धनको प्यानललाई शतप्रतिशत मत दिएर बिजय गराउनु हुनेछ । म यो अपिल गर्न चाहन्छु र मतदानका निम्ती आह्वान पनि गर्न चाहन्छु ।