‘बोल माया’ गीत बज्दा परदेशीका आफन्तको आँखामा आँशू छल्कियो

रामेछाप– “बोल माया एकबचन बोल तिम्रै बोली छ मलाई अनमोल” पर्दामा प्रकाश सपुतको गीत घन्किइरहँदा कार्यक्रमका अधिकांश सहभागीहरुका आँखाको गहभरी आँशू छल्कियो ।
दोरम्बा गाउँपालिकाले कार्यान्वयनमा ल्याएको सामी रोजगार प्रबद्र्धन कार्यक्रम अन्तर्गत दोरम्बा गाउँपालिका–३ सिंगार्चेमा आयोजना गरिएको वैदेशिक रोजगार सम्बन्धि अभिमुखीकरण कार्यक्रममा ‘बोल माया’ बोलको गीत बज्दा वैदेशिक रोजगारीमा गएकाहरुको आफन्तका आँखामा आँशू छल्किएको हो ।
गीत बज्दा परदेशिएका आफन्तहरुले परदेशीलाई सम्झिरहेको अनूभूति गर्न सकिन्थ्यो । दोरम्बा गाउँपालिका–३ सिँगार्चे जहाँ कार्यक्रम आयोजना गरिएको थियो त्यस टोलका प्रत्येक घरका मानिस वैदेशिक रोजगारीमा गएका छन् ।
समुदायलाई वैदेशिक रोजगार सम्बन्धित सचेत बनाउन समुदाय तहमा नै सुरक्षित बैदेशिक रोजगारी सम्वन्धि अभिमुखिकरण कार्यक्रमको आयोजना गरिएको थियो । अभिमुखीकरण कार्यक्रम मार्फत लक्षित व्यक्तिसम्म एकैसाथ सूचना पु¥याउन सकिने भएकाले पालिकाको आयोजनामा समुदाय अभिमुखिकरण कार्यक्रम सञ्चालन गरिएको सामी कार्यक्रमका मनोपरामर्शकर्ता नोर्वु योञ्जनले बताए ।
सचेतिकरण कार्यक्रमले बिषेशगरी यस बर्ष समुदाय तहमा बित्तीय साक्षरता कक्षा, मनोपरामर्श सेवा र रिटर्नी स्वयंसेवक परिचालनका नियमित कार्यक्रमहरु सञ्चालन गरिरहेको छ । बैदेशिक रोजगारीमा जाने निर्णय गरेका व्यक्तिहरुलाई बैदेशिक रोजगारी सम्वन्धि निःशूल्क परामर्श सेवाका लागि जिल्ला प्रशासन कार्यालयमा रहेको आप्रवासी स्रोत केन्द्र मार्फत सेवा दिंदै आइरहेको छ ।

नेपाल सरकार र स्वीस सरकारको साझेदारी, सामी/हेल्भेटासको प्राविधिक सहयोग र स्थानीय सरकारहरुको नेतृत्वमा रामेछाप जिल्लाको मन्थली नगरपालिका, सुनापति, दोरम्बा र उमाकुण्ड गाउँपालिकाले सामी/रोजगार प्रर्बद्धन कार्यक्रम सञ्चालन गरिरहेको छ ।
कार्यक्रमले “स्वदेशमा नै रोजगारी गरौं, बैदेशिक रोजगारीमा जाने नै भए सही सूचना लिएर र सीप सिकेर मात्र जाऔं ।” भन्ने निर्देशक सिद्धान्तका आधारमा कार्यक्रम सञ्चालन गर्दै आएको सामी÷रोजगार प्रर्बद्धन कार्यक्रमका संयोजक सागर बिक्रम बस्नेत जानकारी दिए ।
दोरम्बा गाउँपालिकाले गत आर्थिक बर्षमा गरेको ७ वटै वडाको सर्वेक्षण अनुसार १ हजार ५ सय ८३ जना बैदेशिक रोजगारीमा गएको प्रारम्भिक तथ्यांक संकलन गरेको छ । त्यसैको आधारमा बस्तीबाट बिदेश जाने व्यक्तिको परिवार, बैदेशिक रोजगारीबाट फर्किएका कामदार र कामका लागि बिदेश जाने सम्भावित यूवाहरुलाई लक्षित गरि अभिमुखिकरण कार्यक्रम आयोजना गरिएको मनोपरामर्शकर्ता योञ्जनले जानकारी दिए ।

बैदेशिक रोजगारीमा जाने अधिकांश युवाहरु हतारमा जान खोज्दा समस्यामा पर्ने, बिदेश जानुपूर्व लिनुपर्ने सीप तालिमलाई महत्व नदिने जस्ता कारणहरुले स्वदेश तथा बिदेशमा समेत समस्यामा पर्ने गरेका छन् । बैदेशिक रोजगारीमा जाँदा तयार गरिएको कागजपत्र परिवारको साथमा नँहुदा समस्यामा पर्दा समेत पीडित व्यक्ति तथा परिवारलाई तत्काल सहयोग गर्न समस्या हुने हुँदा सचेतीकरणको लागि समुदाय अभिमुखिकरण गरिएको योञ्जनको भनाई छ ।
यही माघ १२ गते सोमबारदेखि १४ गते बुधबारसम्म सञ्चालन गरिएको समुदाय अभिमुखिकरण कार्यक्रममा दोरम्बा गाउँपालिका–२ बोदलडाँडाका २६ जना, ढोइगाउँका ४९ जना र दोरम्बा–३ सिँगार्चेका ५० जना अभिमुखीकारण कार्यक्रममा सहभागी भएका थिए ।
अभिमुखीकरण कार्यक्रममा सामी/हेल्भेटासका कार्यक्रम अधिकृत भोजराज सुनुवार, सामी/रोजगार प्रर्बद्धन कार्यक्रमका संयोजक सागर बिक्रम बस्नेत, दोरम्बा गाउँपालिकाका मनोपरामर्शकर्ता नोर्वू योञ्जन, रिटर्नी स्वयंसेवक बाबुराम तामाङ र भोजराज थापामगरले सहजीकरण गरेका थिए ।